ਧਰਮ ਦੇ ਨਾਂ ਤੇ !

ਧਰਮ ਦੇ ਨਾਂ ਤੇ !!

ਦੁਨੀਆਂ-ਦਾਰੀ, ਭਰਮਾਂ ਮਾਰੀ ,
ਠੰਡਾ ਮਿਲਦਾ ਗਰਮ ਦੇ ਨਾਂ ਤੇ ।
ਧੱਕੇ ਨਾਲ ਖੁਆਈ ਜਾਂਦੀ,
ਕਾਠ ਦੀ ਰੋਟੀ ਨਰਮ ਦੇ ਨਾਂ ਤੇ ।।

ਵਰਤਮਾਨ ਦੀ ਕਿਰਤ ਨੂੰ ਛੱਡਕੇ,

ਅਗਲੇ ਪਿਛਲੇ ਜਨਮਾਂ ਕਾਰਣ,

ਬਿਪਰੀ ਆਵਾਗਵਣਾ ਵਾਲਾ,

ਕਰਮ ਪੜ੍ਹਾਉਂਦੇ ਕਰਮ ਦੇ ਨਾਂ ਤੇ ।।

ਇਕਨਾਂ ਮੰਦਰੀਂ ਨੰਗੇ ਬੁੱਤ ਨੇ,

ਇਕਨਾਂ ਨੰਗੇ ਸ਼ਬਦ ਸਜਾਏ,

ਨੰਗੀ ਸ਼ਾਇਰੀ ਦੀ ਮੱਤ ਵੱਖਰੀ,

ਸ਼ਰਧਾ ਆਖਣ ਸ਼ਰਮ ਦੇ ਨਾਂ ਤੇ ।।

ਕੁਦਰਤ ਜਿਹੜੇ ਨਿਯਮ `ਚ ਚਲਦੀ,

ਉਹ ਬ੍ਰਹਿਮੰਡੀ ਧਰਮ ਸਦਾਏ,

ਹਰ ਘਟਨਾ ਦਾ ਨਿਯਮ, ਧਰਮ ਹੈ,

ਦੁਨੀਆਂ ਮਰਦੀ ਭਰਮ ਦੇ ਨਾਂ ਤੇ ।।

ਧਰਮ ਹੁੰਦਾ ਗੁਣ ਧਾਰਨ ਕਰਨਾ,

ਕੁਦਰਤ ਦੇ ਨਿਯਮਾ ਸੰਗ ਤੁਰਨਾਂ,

ਲੇਕਨ ਅਜਬ ਪਸਾਰਾ ਜੱਗ ਦਾ,

ਧਰਮ ਬਿਨਾਂ, ਸਭ ਧਰਮ ਦੇ ਨਾਂ ਤੇ ।।

ਗੁਰਮੀਤ ਸਿੰਘ ‘ਬਰਸਾਲ’ (ਕੈਲੇਫੋਰਨੀਆਂ)