ਚੋਣ-ਮੌਸਮ !
ਚੋਣਾਂ ਵਾਲਾ ਮੌਸਮ ਜਦ ਵੀ ਧਾਉਂਦਾ ਹੈ ।
ਹਰ ਆਫਤ ਤੋਂ ਵਧਕੇ ਖੌਰੂ ਪਾਉਂਦਾ ਹੈ ।।
ਹਸਦੇ ਵਸਦੇ ਲੋਕੀਂ ਜਿਹੜੇ ਸਾਲਾਂ ਦੇ,
ਇੱਕ ਦੂਜੇ ਦੇ ਵੈਰੀ ਝੱਟ ਬਣਾਉਂਦਾ ਹੈ ।।
ਮਜਹਬਾਂ,ਜਾਤਾਂ,ਵਰਗਾਂ ਦੀ ਗਲ ਕਰਨੀ ਕੀ,
ਤੇੜਾਂ ਉਹ ਤਾਂ ਘਰ-ਘਰ ਅੰਦਰ ਚਾਹੁੰਦਾ ਹੈ ।।
ਫੋਕੀ ਠੁੱਕ ਬਣਾਵਣ ਵਾਲਾ ਭਰਮ ਦਿਖਾ,
ਚੇਲੇ,ਚਮਚੇ,ਭਗਤ ਬਣਾ ਭਰਮਾਉਂਦਾ ਹੈ ।।
ਹਰ ਵਾਰੀ ਉਹ ਸ਼ਾਤਿਰ ਧੋਖਾ ਦੇ ਜਾਂਦਾ,
ਬੁੱਲ ਊਠ ਦਾ ਪਰਜਾ ਨੂੰ ਤਰਸਾਉਂਦਾ ਹੈ ।।
ਰੋਟੀ ਸਸਤੀ ਕਰਨ ਦਾ ਲਾਰਾ ਲਾ ਦਿੰਦਾ,
ਐਪਰ ਰੋਟੀ ਥੱਪਣੀ ਨਹੀਂ ਸਿਖਾਉਂਦਾ ਹੈ ।।
ਧੁਰ ਅੰਦਰ ਤੱਕ ਮੌਸਮ ਵਾਲਾ ਅਸਰ ਬੁਰਾ,
ਅਣਖ ਜਮੀਰਾਂ ਤੋਲ ਸੇਲ ਤੇ ਲਾਉਂਦਾ ਹੈ ।।
ਜਿੱਤਣ ਵਾਲਾ ਤਾਂ ਜਿੱਤਕੇ ਤੁਰ ਜਾਂਦਾ ਹੈ,
ਭਾਈਚਾਰਾ ਹਰ ਵਾਰੀ ਹਰ ਆਂਉਂਦਾ ਹੈ ।।
ਗੁਰਮੀਤ ਸਿੰਘ ‘ਬਰਸਾਲ’ (ਕੈਲੇਫੋਰਨੀਆਂ)
