ਇੱਕ (੧) ਦੀ ਗੱਲ

ਇੱਕ (੧) ਦੀ ਗੱਲ


ਜੇਕਰ ਇੱਕੋ ਗ੍ਰੰਥ ਦੇ ਨਾਲ ਜੁੜੀਏ ,

ਏਕਾ ਸਦਾ ਲਈ ਕੌਮ ਵਿੱਚ ਰਹਿ ਸਕਦਾ ।

ਗੁਰੂ ਬਾਬੇ ਦਾ ਫਲਸਫਾ ਸਮਝਣੇ ਲਈ ,

ਤਾਹੀਓਂ ਸਿੱਖ ਸੰਸਾਰ ਨੂੰ ਕਹਿ ਸਕਦਾ ।

ਗੁਰੂ ਨਾਨਕ ਦੇ ਇੱਕ(੧) ਦੀ ਗੱਲ ਅੱਜ ਕਲ ,

ਲਗਦਾ ਸਿੱਖਾਂ ਨੇ ਉੱਕਾ ਭੁਲਾ ਛੱਡੀ ,

ਵਰਨਾ ਗੁਰੂ ਗ੍ਰੰਥ ਦੀ ਛਾਂ ਥੱਲੇ ,

ਸਾਰਾ ਜਗਤ ਹੀ ਪਿਆਰ ਨਾਲ ਬਹਿ ਸਕਦਾ ।।

ਗੁਰੂ ਗ੍ਰੰਥ ਦਾ ਪੰਥ

ਗੁਰੂ ਗ੍ਰੰਥ ਦਾ ਪੰਥ


ਤਾਣੀ ਸਦੀਆਂ ਤੋਂ ਉਲਝੀ ਹੈ ਪਈ ਜਿਹੜੀ ,

ਇਹਨੂੰ ਬਹਿਕੇ ਸੁਲਝਾਉਣ ਦਾ ਹੱਲ ਕਰੀਏ ।

ਡੇਰੇਦਾਰਾਂ ਦੇ ਪੰਥਾਂ ਨੂੰ ਛੱਡ ਕੇ ਤੇ ,

ਗੁਰੂ ਗ੍ਰੰਥ ਦੇ ਪੰਥ ਦੀ ਗੱਲ ਕਰੀਏ ।

ਕਿਸੇ ਹੋਰ ਗ੍ਰੰਥ ਜਾਂ ਦੇਹਧਾਰੀ ,

ਸੰਪਰਦਾਵਾਂ ਨੂੰ ਸਿੱਖੀ ਤੋਂ ਬਾਹਰ ਕਰਕੇ ;

ਆਖਿਰ ਇੱਕ ਦਾ ਹੋਣ ਤੇ ਗੱਲ ਬਣਨੀ ,

ਭਾਵੇਂ ਅੱਜ ਕਰੀਏ ਭਾਵੇਂ ਕੱਲ੍ਹ ਕਰੀਏ ।।

ਦਸਤਾਰ ਤੇ ਹਮਲਾ

ਦਸਤਾਰ ਤੇ ਹਮਲਾ




ਗੁਰੂ ਗ੍ਰੰਥ ਦੀ ਨਿਆਰੀ ਵਿਚਾਰਧਾਰਾ,



ਦੁਨੀਆਂ ਬੈਠ ਅੱਜ ਧਿਆਨ ਨਾਲ ਪੜ੍ਹ ਰਹੀ ਏ ।



ਧਰਮ ਚਿੰਤਕਾਂ ਵਿੱਚ ਨਿਆਰੇ ਫਲਸਫੇ ਦੀ,



ਗੁੱਡੀ ਉੱਚੇ ਅਸਮਾਨਾਂ ਤੇ ਚੜ੍ਹ ਰਹੀ ਏ ।



ਐਪਰ ਜਿਨ੍ਹਾਂ ਦੀ ਪੱਗ ਬਚਾਉਣ ਖਾਤਿਰ,



ਸਿੱਖ ਸਦਾ ਜਰਵਾਣਿਆਂ ਨਾਲ ਭਿੜਿਆ ;



ਉਸੇ ਦੇਸ਼ ਦੇ ਰਾਖੇ ਦੀ ਅੱਖ ਅੰਦਰ,



ਪੱਗ ਸਿੱਖ ਦੀ ਮਿਰਚ ਬਣ ਲੜ ਰਹੀ ਏ ।।


ਡਾ ਗੁਰਮੀਤ ਸਿੰਘ ਬਰਸਾਲ ਕੈਲੇਫੋਰਨੀਆਂ