ਗੁਰਦੁਆਰਾ ਚੋਣਾਂ !!
ਗੁਰਦੁਆਰੇ ਦੀਆਂ ਚੋਣਾਂ, ਜਦ ਤੋਂ ਆਈਆਂ ਨੇ ।
ਗੁਰਮਤਿ ਵਾਲੀਆਂ ਧੱਜੀਆਂ ਰੱਜ ਉਡਾਈਆਂ ਨੇ ।।
ਰਾਜਨੀਤੀ ਦੇ ਝੂਠੇ, ਪੈਂਤੜਿਆਂ ਨੇ ਆ,
ਸਿੱਖੀ ਅੰਦਰ ਕਿੱਲਾਂ ਖੂਬ ਵਿਛਾਈਆਂ ਨੇ ।
ਸੇਵਾ ਦਾ ਸੰਕਲਪ ਸਦਾ ਲਈ ਮੇਟਣ ਨੂੰ,
ਸੇਵਾਦਾਰੀਆਂ ਅਹੁਦਿਆਂ ਵਿੱਚ ਵਟਾਈਆਂ ਨੇ ।
ਚੌਧਰ ਵਾਲੇ ਨਸ਼ੇ ਨੂੰ ਪੂਰਿਆਂ ਕਰਨ ਲਈ,
ਚਾਣਕੀਆ ਦੀਆਂ ਨੀਤੀਆਂ ਸਭ ਅਪਣਾਈਆਂ ਨੇ ।
ਸੱਚਾ-ਝੂਠਾ
ਵੋਟਾਂ ਦੇ ਨਾਲ ਲੱਭਣਾਂ ਹੈ,
ਧਰਮ ਤੇ ਨੀਤੀ ਇੱਕੋ ਰਸਤੇ ਪਾਈਆਂ ਨੇ ।
ਉਮੀਦਵਾਰਾਂ ਲਈ ਕੋਈ ਵੀ ਕਿਰਦਾਰ ਨਹੀਂ,
ਬਾਹਰੋਂ ਦਿਖਦੀਆਂ ਸ਼ਰਤਾਂ ਹੀ ਬਸ ਲਾਈਆਂ ਨੇ ।
ਗੋਲਕ ਸਾਂਭ ਕਮੇਟੀ ਹੱਥ ਵਿੱਚ ਰੱਖਣ ਲਈ,
ਰਾਜਨੀਤਕ-ਜੀ ਦੇਂਦੇ ਖੂਬ ਵਧਾਈਆਂ ਨੇ ।
ਰਾਜਨੇਤਾ ਨੂੰ ਜਿੱਤੇ ਹੋਏ ਸਨਮਾਨਣਗੇ,
ਨਿੱਜੀ ਹਿੱਤਾਂ ਖਾਤਿਰ ਯਾਰੀਆਂ ਲਾਈਆਂ ਨੇ ।
ਹਾਰਨ ਵਾਲੇ ਧੜੇ ਨੇ ਗੁੱਸਾ ਕੱਢਣ ਲਈ,
ਰਹਿੰਦੀ ਪਾਰੀ ਪੱਟਦੇ ਰਹਿਣਾ ਖਾਈਆਂ ਨੇ ।
ਹਰ ਵਾਰੀ ਸੰਗਤ ਧੜਿਆਂ ਵਿੱਚ ਵੰਡ ਹੁੰਦੀ,
ਛੱਡਕੇ ਮਿੱਠਤ ਪਿਆਰ ਨਫਰਤਾਂ ਛਾਈਆਂ ਨੇ ।
ਜੇਕਰ ਸਿੱਖਾਂ ਹੱਲ ਬਦਲਵਾਂ ਨਾਂ ਲੱਭਿਆ,
ਹੋਣੀਆਂ ਏਥੇ ਮੁੜ-ਮੁੜ ਜੱਗ ਹਸਾਈਆਂ ਨੇ ।।
ਗੁਰਮੀਤ ਸਿੰਘ ‘ਬਰਸਾਲ’ (ਕੈਲੇਫੋਰਨੀਆਂ)
