ਬੰਦਾ !!
ਪੈਸਿਆਂ ਦੇ ਨਾਲ ਬੰਦਾ ਭਾਵੇਂ ਵੱਡਾ ਬਣੀ ਜਾਵੇ,
ਵੱਡਾ ਅਖਵਾਉਂਦਾ ਸਦਾ ਦਿਲ ਦਾ ਅਮੀਰ ਜੀ ।
ਚਮੜੀ ਤਾਂ ਕੋਈ ਭਲਾਂ ਕਿੰਨੀ ਲਿਸ਼ਕਾਈ ਫਿਰੇ,
ਲੋਕਾਂ ਨੂੰ ਤੇ ਭਾਉਂਦਾ ਮਨੋ ਸੋਹਣਾ ਹੀ ਸ਼ਰੀਰ ਜੀ ।
ਰੱਜਕੇ ਸੁਨੱਖਾ ਭਾਵੇਂ ਗੋਰਾ ਚਿੱਟਾ ਲੰਬਾ ਹੋਵੇ,
ਅਕਲਾਂ ਤੋਂ ਬਾਝੋਂ ਲੱਗੇ ਭੱਦਾ ਹੀ ਅਖੀਰ ਜੀ ।
ਵੱਡੜੀ ਉਮਰ ਨਾਲ ਮਿਲਦੀ ਬਜੁਰਗੀ ਨਾ,
ਸੂਝ ਮਾਰੇ ਸਦਾ ਵੱਡੇ ਹੋਣ ਦੀ ਲਕੀਰ ਜੀ ।
ਨਸ਼ਿਆਂ ਦਾ ਖਾਧਾ ਬੰਦਾ ਲੱਕੜ ਸਿਓਂਕੀ ਹੁੰਦਾ,
ਦੇਖਣੇ ਨੂੰ ਲੱਗੇ ਭਾਵੇਂ ਯੋਧਾ ਬਲਵੀਰ ਜੀ ।
ਬਾਹਰੀ ਰੂਪ ਵਾਲੀ ਭਾਵੇਂ ਕੋਈ ਨਾ ਪਸੰਦ ਕਰੇ,
ਗੁਣਾਂ ਵਾਲੀ ਚਾਹੀਦੀ ਪਸੰਦ ਤਸਵੀਰ ਜੀ ।
ਨਦੀਆਂ ਸਰੋਵਰਾਂ `ਚ ਭਾਵੇਂ ਕੋਈ ਨਹਾਵੇ ਕਿੰਨਾ,
ਮਨ ਵਾਲੀ ਮੈਲ਼ ਲਾਹੇ ਨਿਮਰਤਾ ਦਾ ਨੀਰ ਜੀ ।
ਓਹੀ ਬੰਦਾ ਜੱਗ ਉੱਤੇ ਬੰਦਾ ਅਖਵਾਉਣ ਯੋਗ,
ਜਿਹੜਾ ਉੱਚਾ ਰੱਖੇ ਕਿਰਦਾਰ ਤੇ ਜਮੀਰ ਜੀ ।।
ਗੁਰਮੀਤ ਸਿੰਘ ‘ਬਰਸਾਲ’ (ਕੈਲੇਫੋਰਨੀਆਂ)
