ਡੱਗਾ !!

ਜਦ ਵੀ ਮੈਨੂੰ ਕਲਮ ਚੁੱਕਣ ਦੀ ਲੱਗੀ ਹੈ ।
ਕਾਗਜ ਦੇ ਨਾਲ ਲਗਦਾ ਵੱਜੀ ਠੱਗੀ ਹੈ ।।
ਮਹਿੰਗੀ ਕਲਮ-ਦਵਾਤ ਵਰਤਕੇ ਦੇਖ ਲਏ,
ਚਾਨਣ ਦੀ ਕੋਈ ਰਿਸ਼ਮ ਕਦੇ ਨਾ ਹੱਗੀ ਹੈ ।
ਉਮਰਾਂ ਨਾਲ ਲਕੀਰਾਂ ਹੋਈਆਂ ਸਿੱਧੀਆਂ ਨਾ,
ਕਾਲੀ ਤੋਂ ਅੱਜ ਹੋਈ ਭਾਵੇਂ ਬੱਗੀ ਹੈ ।
ਨੀਰੋ ਵਾਲੀ ਤਰਜ ਬੰਸਰੀ ਕੱਢਦੀ ਨਾ,
`ਵਾਜ ਮਾਰਦੀ ਫੂਕਾਂ ਹੋ ਗਈ ਘੱਗੀ ਹੈ ।
ਕਾਗਜ ਨੂੰ ਜਦ ਵੀ ਅੱਖਰ ਪਹਿਨਾਏ ਨੇ,
ਸ਼ੀਸ਼ੇ ਆਖਿਆ ਇਹ ਤਾਂ ਬਾਂਦਰ ਝੱਗੀ ਹੈ ।
ਕੁੰਭਕਰਣ ਨੂੰ ਕਿੱਦਾਂ ਦੱਸ ਜਗਾਵਾਂਗਾ ?
ਨਾ ਮੇਰੇ ਕੋਲ ਡੱਗਾ ਤੇ ਨਾ ਡੱਗੀ ਹੈ ।।
ਗੁਰਮੀਤ ਸਿੰਘ ਬਰਸਾਲ (ਕੈਲੇਫੋਰਨੀਆਂ)