Friday, January 27, 2017
ਕਾਂਗਰਸੀ-ਰਾਜ
ਕਾਂਗਰਸੀ-ਰਾਜ !!
ਜੁਲਮ ਸਿੱਖਾਂ ਤੇ ਕਾਂਗਰਸੀ ਰਾਜ ਅੰਦਰ,
ਹੋਇਆ ਮੁਗਲਾਂ ਦਾ ਜੁਲਮ ਸਮੋ ਸਕਦਾ ।
ਘੱਲੂਘਾਰਾ ਹਕੂਮਤ ਨੇ ਜੋ ਕਰਿਆ,
ਕੋਈ ਚਾਹ ਕੇ ਵੀ ਨਹੀਂ ਲੁਕੋ ਸਕਦਾ ।
ਜਿਹੜਾ ਰਾਜ ਗੁਰਧਾਮਾਂ ਤੇ ਚਾੜ੍ਹ ਫੌਜਾਂ,
ਜੁੜੀਆਂ ਸੰਗਤਾਂ ਦਾ ਕਾਤਿਲ ਹੋ ਸਕਦਾ ।
ਨਸਲਕੁਸ਼ੀ ਦੀ ਨਫਰਤੀ ਭਾਵਨਾ ਨਾਲ,
ਲੱਖਾਂ ਸਿੱਖਾਂ ਦੀ ਜਿੰਦਗੀ ਖੋਹ ਸਕਦਾ ।
ਗਲੀਂ ਟਾਇਰ ਪਾ ਸਾੜੇ ਜੋ ਸਿੱਖ ਜਿੰਦਾ,
ਦਾਗ ਅਜ਼ਮਤਾਂ ਵਾਲੇ ਨਹੀਂ ਧੋ ਸਕਦਾ ।
ਢਾਲ਼ ਘੜਕੇ, ਲਾਲਚ ਹਿੱਤ, ਨੀਤਕਾਂ ਦੀ,
ਢਾਲ਼ ਘੜਕੇ, ਲਾਲਚ ਹਿੱਤ, ਨੀਤਕਾਂ ਦੀ,
ਸੁਪਨੇ ਵਿੱਚ ਵੀ ਇਹਨਾਂ ਹਕੂਮਤਾਂ ਦੇ,
ਗੈਰਤਮੰਦ ਨਹੀਂ ਨਾਲ ਖਲੋ ਸਕਦਾ ।
ਕੋਈ ਸਿੱਖ ਚੁਰਾਸੀ ਨਹੀਂ ਭੁੱਲ ਸਕਦਾ,
ਜਿਹੜਾ ਭੁੱਲੇ, ਉਹ ਸਿੱਖ ਨਹੀਂ ਹੋ ਸਕਦਾ ।।
ਗੁਰਮੀਤ ਸਿੰਘ ‘ਬਰਸਾਲ’ (ਕੈਲੇਫੋਰਨੀਆਂ)
Sunday, January 22, 2017
ਅਜੋਕੇ-ਅਕਾਲੀ !!
ਕਹਿਣ ਨੂੰ ਅਕਾਲੀ ਤਾਂ ਅਕਾਲ ਦੇ ਪੁਜਾਰੀ ਹੁੰਦੇ,
ਅੱਜ-ਕੱਲ ਕਾਲ਼-ਮਹਾਂਕਾਲ਼ ਨੂੰ ਧਿਆਉਂਦੇ ਆ ।
ਪੰਥ ਨੂੰ ਵਸਾਉਣ ਦੇ ਲਈ ਖੁਦ ਨੂੰ ਉਜਾੜਦੇ ਸੀ,
ਹੁਣ ਤਾਂ ਇਹ ਆਪਣੇ ਲਈ ਪੰਥ ਮਰਵਾਉਂਦੇ ਆ ।
ਗੁਰੂ ਗ੍ਰੰਥ ਵਾਲੀ ਗੁਰਿਆਈ ਨੂੰ ਵੰਗਾਰਨੇ ਲਈ,
ਬਿਪਰਾਂ ਦੀ ਬਾਣੀ ਨੂੰ ਵੀ ਨਾਲ਼ ਇਹ ਬਿਠਾਉਂਦੇ ਆ ।
ਇੱਕ ਦੇ ਸਿਧਾਂਤ `ਚ ਦੁਫੇੜ ਪੈਦਾ ਕਰਨੇ ਲਈ,
ਦੋ-ਦੋ ਬੇੜੀਆਂ ਚ ਪੈਰ ਧਰਨਾਂ ਸਿਖਾਉਂਦੇ ਆ ।
ਗੁਰੂ ਦੇ ਅਦਬ ਦੇ ਲਈ ਵਾਰਦੇ ਸੀ ਜਾਨਾਂ ਜਿਹੜੇ,
ਅੱਜ-ਕਲ ਆਪ ਹੀ ਬੇ-ਅਦਬੀ ਕਰਾਉਂਦੇ ਆ ।
ਸਿੱਖੀ ਦੀ ਵਿਚਾਰਧਾਰਾ ਹੋਰਨਾਂ ਨੂੰ ਦੱਸਣੀ ਕੀ,
ਸਗੋਂ ਬਿਪਰਨ ਰੀਤਾਂ
ਸਿੱਖਾਂ ਚ ਫੈਲਾਉਂਦੇ ਆ ।
ਗੁਰਾਂ ਕਿਰਦਾਰ ਘੜ ਸਾਜਿਆ ਇਹ ਖਾਲਸਾ ਸੀ,
ਪਰ ਇਹ ਤਾਂ ਵੋਟਾਂ ਘੜ ਹੋਂਦ ਦਰਸਾਉਂਦੇ ਆ ।
ਗੁਰੂ ਜੀ ਨੇ ਕਿਰਪਾ ਲਈ ਦਿੱਤੀ ਕਿਰਪਾਨ ਜਿਹੜੀ,
ਇਹ ਤਾਂ ਮੁੜ ਉਹਨੂੰ ਤਲਵਾਰ ਹੀ ਬਣਾਉਂਦੇ ਆ ।
ਨਿਤਾਣਿਆਂ,ਨਿਮਾਣਿਆਂ,ਨਿਓਟਿਆਂ ਤੇ ਲੋੜਵੰਧਾਂ,
ਲਾਲੋਆਂ ਨੂੰ ਭੁੱਲ ਇਹ ਤਾਂ ਭਾਗੋ ਨੂੰ ਰਿਝਾਉਂਦੇ ਆ ।
ਗੁਰੂ ਦਿਆਂ ਸਿੱਖਾਂ ਉੱਤੇ ਜੁਲਮ ਜੋ ਬੰਦਾ ਕਰੇ,
ਸਜਾ ਨਾਲੋਂ ਉਹਨੂੰ ਸਗੋਂ ਆਪ ਹੀ ਬਚਾਉਂਦੇ ਆ ।
ਸੰਗਤਾਂ ਦੀ ਸੇਵਾ ਤੋਂ ਨਵਾਬੀਆਂ ਨੂੰ ਵਾਰਨੇ ਦਾ,
ਛੱਡ ਇਤਿਹਾਸ ਝੂਠ ਨੀਤੀਆਂ ਪੜ੍ਹਾਉਂਦੇ ਆ ।
ਬੋਲਾਂ `ਚ ਮਿਠਾਸ ਨਾ ਨਿਮਰ ਨਾ ਹੀ ਸਹਿਣਸ਼ੀਲ,
ਬਿਨ੍ਹਾਂ ਇਖਲਾਕੋਂ ਹੀ ਅਕਾਲੀ ਅਖਵਾਉਂਦੇ ਆ ।।
ਗੁਰਮੀਤ ਸਿੰਘ ‘ਬਰਸਾਲ’(ਕੈਲੇਫੋਰਨੀਆਂ)
Tuesday, January 10, 2017
ਵੋਟਰ ਨੂੰ !
ਵੋਟਰ ਨੂੰ !!
ਵੋਟ ਪਾਉਣ ਵਾਲਿਆ ਵੇ ਇੰਨਾਂ ਕੁ ਖਿਆਲ ਰੱਖੀਂ,
ਤੇਰੀ ਵੋਟ ਦੱਸਣਾ ਸਮਾਜ ਦੀ ਪਸੰਦ ਨੂੰ ।
ਸਬਰਾਂ ਦੀ ਹੱਦ ਲੰਘ ਸੋਚੇ ਬਦਲਾਵ ਨੂੰ ਜਾਂ,
ਲੁੱਟ-ਕੁੱਟ ਸਹਿਣ ਵਾਲੇ ਆਖੇ ਗਏ ਆਨੰਦ ਨੂੰ ।
ਵੋਟ ਨਾਲ ਸਹਿਮਤੀ ਤੇ ਸਹੀ ਠਹਿਰਾਉਣਾ ਹੁੰਦਾ,
ਲੀਡਰਾਂ ਦੇ ਕੰਮਾਂ ਤੇ ਚੜ੍ਹਾਏ ਹੋਏ ਚੰਦ ਨੂੰ ।
ਗਰਜਾਂ ਦੀ ਆੜ ਥੱਲੇ ਵੇਚਕੇ ਜਮੀਰ ਸਦਾ,
ਹੁੰਦਾ ਪਛਤਾਉਣਾ ਪਿੱਛੋਂ ਪਿਟ ਚੁੱਕੇ ਧੰਦ ਨੂੰ ।
ਵਾਰੀ-ਵਾਰੀ ਠੱਗਾਂ ਕੋਲੋਂ ਛਿੱਤਰ ਹੀ ਖਾਈ ਜਾਵੇ,
ਸਮਝ ਨਾ ਆਵੇ ਲੋਕ-ਰਾਜੀ ਫਰਜੰਦ ਨੂੰ ।
ਨਵੀਆਂ ਸੋਚਾਂ ਦੇ ਨਾਲ ਨਵਾਂ ਕੁਝ ਸੋਚਣਾ ਜਾਂ,
ਮਾਰਨੀ ਏਂ ਚੁੰਝ ਮੁੜ-ਮੁੜ ਉਸੇ ਗੰਦ ਨੂੰ ।
ਪਰਖੇ ਹੋਏ ਚੋਰਾਂ ਨਾਲੋਂ ਨਵਿਆਂ ਤੇ ਆਸ ਰਹਿੰਦੀ,
ਘੱਟੋ-ਘੱਟ ਅੱਧੀ ਤਾਂ ਗੁੰਜਾਇਸ਼ ਮੁੱਠੀ ਬੰਦ ਨੂੰ ।
ਭੁੱਲੀਂ ਨਾ ਚੁਰਾਸੀ ਅਤੇ ਨਾਹੀਂ ਵੋਟਾਂ ਵੇਲੇ ਭੁੱਲੀਂ,
ਕੱਲੇ-ਕੱਲੇ ਬਾਣੀ ਦੇ ਬੇਅਦਬੀ ਮਸੰਦ ਨੂੰ ।।
ਗੁਰਮੀਤ ਸਿੰਘ ‘ਬਰਸਾਲ’ (ਕੈਲੇਫਰਨੀਆਂ)
Thursday, December 22, 2016
ਗੰਗੂ !
!!ਗੰਗੂ
!!
‘ਗੰਗੂ’ ਕੇਵਲ ਨਾਮ ਨਹੀਂ ਹੁੰਦਾ,
‘ਗੰਗੂ’ ਤਾਂ ਇਕ ਸੋਚ ਹੁੰਦੀ ਹੈ ।
ਅਕ੍ਰਿਤਘਣਾਂ ਦੇ ਲੋਭੀ ਮਨ ਦੀ,
ਸਭ ਤੋਂ ਗੰਦੀ ਲੋਚ ਹੁੰਦੀ ਹੈ ।।
ਇਸ ਧਰਤੀ ਦੇ ਹਰ ਖਿੱਤੇ ਤੇ,
ਲੱਖਾਂ ਹੀ ਅੱਜ ‘ਗੰਗੂ’ ਵਸਦੇ ।
ਜਿਹਨਾਂ ਕਾਰਣ ਖਲਕਤ ਇੱਥੇ,
ਹਰ ਪੱਧਰ ਤੇ ਨੋਚ ਹੁੰਦੀ ਹੈ ।।
ਲਾਲਚ ਦੇ ਵਿੱਚ ਅੰਨ੍ਹਾਂ ਹੋਕੇ,
ਬੰਦਾ ਜਦ ‘ਗੰਗੂ’ ਬਣ ਜਾਂਦਾ ।
ਦੇਰ-ਸਵੇਰੇ ਆਖਿਰ ਨੂੰ ਤਾਂ,
ਪੱਟੀ ਉਸਦੀ ਪੋਚ ਹੁੰਦੀ ਹੈ ।।
ਦੁਸ਼ਮਣ ਲੱਖ ਜਮਾਨਾ ਹੋਵੇ,
ਪੂਰੀ ਕੌਮ ਨਾ ‘ਗੰਗੂ’ ਹੁੰਦੀ ।
ਜੇਕਰ ਏਦਾਂ ਜਾਪੇ ਤਾਂ ਫਿਰ,
ਮਨ ਦੇ ਪੈਰੀਂ ਮੋਚ ਹੁੰਦੀ ਹੈ ।।
ਸਭ ਦੇ ਨਾਲੋਂ ਗਿਰੀ ਘਨਾਉਣੀ,
‘ਗੰਗੂ’ ਤਾਂ ਹੁਣ ਗਾਲ਼ ਬਣ ਗਈ ।
ਮਨ ਵਿੱਚ ‘ਗੰਗੂ’ ਜੇ ਵੜ ਜਾਵੇ,
ਫਿਰ ਨਾ ਇੱਜਤ ਬੋਚ ਹੁੰਦੀ ਹੈ ।।
ਅੰਦਰ ‘ਗੰਗੂ’ ਪਾਲ਼ ਆਪਦੇ,
ਬਾਹਰਲੇ ਨਾਲ਼ ਲੜਨਾ ਚਾਹੇ ।
ਤਾਹੀਓਂ ‘ਗੰਗੂਬਾਦ’ ਤੇ ਭੋਰਾ,
ਅਉਂਦੀ ਨਹੀਂ ਖਰੋਚ ਹੁੰਦੀ ਹੈ ।।
ਗੁਰਮੀਤ ਸਿੰਘ ‘ਬਰਸਾਲ’ (ਕੈਲੇਫੋਰਨੀਆਂ)
Saturday, December 3, 2016
ਕਾਲਾ ਧਨ !!
ਕਾਲਾ ਧਨ !!
ਕਾਲਾ –ਚਿੱਟਾ ਕੁਝ ਨਹੀਂ ਹੁੰਦਾ,
ਧਨ ਤੇ ਕੇਵਲ ਧਨ ਹੁੰਦਾ ਹੈ ।
ਕਾਲਾ-ਚਿੱਟਾ ਕਰਨੇ ਵਾਲਾ,
ਨੀਤੀ, ਨੀਅਤ, ਮਨ ਹੁੰਦਾ ਹੈ ।।
ਕਿਰਤੀ ਬੰਦੇ ਬੈਂਕਾਂ ਅੱਗੇ,
ਛੱਡ ਕੇ ਕੰਮ ਜਦ ਧੱਕੇ ਖਾਂਦੇ ।
ਹੇਠਲਿਆਂ ਦੀ ਲਾਚਾਰੀ ਤੱਕ,
ਉਪਰਲਿਆਂ ਦਾ ਫਨ ਹੁੰਦਾ ਹੈ ।।
ਢਿੱਡ ਨੂੰ ਗੰਢਾਂ ਮਾਰ ਸੁਆਣੀ,
ਛਿੱਲੜ ਚਾਰ ਲੁਕਾਕੇ ਰਖੇ ।
ਉਹ ਕੀ ਜਾਣੇ ਵਿੱਚ ਗਰੀਬੀ,
ਬੱਚਤ ਕਰਨ ਡੰਨ ਹੁੰਦਾ ਹੈ ।।
ਕਾਲੇ ਧਨ ਦਾ ਅਸਲ ਵਪਾਰੀ,
ਓਹੀਓ ਹੁੰਦਾ ਨੀਤੀ ਘਾੜਾ ।
ਨੋਟਾਂ ਦੀ ਅਦਲਾ ਬਦਲੀ ਵਿੱਚ,
ਬਿਜਨਸ ਜਿਸਦਾ ਰਨ ਹੁੰਦਾ ਹੈ ।।
ਨੋਟ-ਬੰਦੀ ਨਾਲ ਰੁਕੇ ਕੰਮਾਂ ਦਾ,
ਘਾਟਾ ਪਰਜਾ ਨੇ ਹੀ ਭਰਨਾਂ ।
ਆਪਣੇ ਸਿਰ ਤੇ ਆਪਣੀ ਜੁੱਤੀ,
ਏਹੀਓ ਅਪਨਾਪਨ ਹੁੰਦਾ ਹੈ ।।
ਨੀਅਤ ਭਾਵੇਂ ਚੰਗੀ ਹੋਵੇ,
ਪਰ ਜੇ ਨੀਤੀ ਠੀਕ ਨਾ ਹੋਵੇ ।
ਰੋਣੇ-ਧੋਣੇ ਪਰਜਾ ਵਾਲੇ,
ਉਸਦੇ ਲਈ ‘ਜਨ-ਗਣ’ ਹੁੰਦਾ ਹੈ ।।
ਗੁਰੂਆਂ ਦੀ ਜੇ ਸਿੱਖਿਆ ਮੰਨੀਏਂ,
ਦੌਲਤ ਤਾਂ ‘ਗੁਜਰਾਨ’ ਹੈ ਹੁੰਦੀ ।
ਆਖਿਰ ਵੇਲੇ ਖਾਲੀ ਹੱਥੀਂ,
ਕੱਫਨ ਕੱਜਿਆ ਤਨ ਹੁੰਦਾ ਹੈ ।।
ਗੁਰਮੀਤ ਸਿੰਘ ‘ਬਰਸਾਲ’ (ਕੈਲੇਫੋਰਨੀਆਂ)
Sunday, November 27, 2016
ਏਕਸ ਕੇ ਬਾਰਿਕ !
ਏਕਸ ਕੇ ਬਾਰਿਕ !!
ਹਿੰਦੂ-ਮੁਸਲਿਮ-ਸਿੱਖ–ਇਸਾਈ ।
ਬਣ ਸਕਦੇ ਨੇ ਭਾਈ-ਭਾਈ ।
ਆਪੋ ਆਪਣੇ ਮਜਹਬਾਂ ਦੇ ਜੇ,
ਪਾਧਿਆਂ ਕੋਲੋਂ ਜਾਨ ਛਡਾਈ ।।
ਹਰ ਮਜ਼ਹਬ ਦੇ ਠੱਗ ਪੁਜਾਰੀ ।
ਬਣਕੇ ਬੈਠੇ ਧਰਮ ਵਪਾਰੀ ।
ਲੁੱਟਕੇ ਖਾਧੀ ਦੁਨੀਆਂ ਸਾਰੀ ।
ਰੱਖਦੇ ਬੰਦੇ ਦੀ ਮੱਤ ਮਾਰੀ ।
ਸ਼ਰਧਾਵਾਨਾ ਦੇ ਜਜਬਾਤਾਂ ਸਿਰ ਤੇ ਕਰਨ ਕਮਾਈ ।।
ਮਜ਼ਹਬਾਂ ਵਾਲਾ ਰੌਲਾ ਇੱਕੋ ।
ਹੁੰਦਾ ਭੇਖੀ ਚੋਲਾ ਇੱਕੋ ।
ਲੁਟਣ ਵਾਲਾ ਟੋਲਾ ਇਕੋ ।
ਹੁੰਦਾ ਭੇਖੀ ਚੋਲਾ ਇੱਕੋ ।
ਲੁਟਣ ਵਾਲਾ ਟੋਲਾ ਇਕੋ ।
ਲੁੱਟ ਹੋਂਵਦਾ ਭੋਲਾ ਇੱਕੋ ।
ਰੱਬ ਦੇ ਨਾਂ ਤੇ ਲੁੱਟ ਜਦ ਹੁੰਦੀ ਸੁਣਦਾ ਕੌਣ ਦੁਹਾਈ ।।
ਸਾਰੇ ਮਜ਼ਹਬੀਂ ਧਰਮ ਹੈ ਸਾਂਝਾ ।
ਜੀਵਨ ਵਾਲਾ ਕਰਮ ਹੈ ਸਾਂਝਾ ।
ਜੰਮਣਾ-ਜੀਣਾ-ਮਰਨ ਹੈ ਸਾਂਝਾ ।
ਪੂਜਾ ਭਰਿਆ ਭਰਮ ਹੈ ਸਾਂਝਾ ।
ਤੋਰੇ ਸਾਰੇ ਵੱਖ-ਵੱਖ ਰਸਤੇ ਇੱਕ ਮੰਜਿਲ ਦੇ ਰਾਹੀ ।।
ਮਜ਼ਹਬੀ ਆਗੂ ਜੋ ਅਖਵਾਉਂਦੇ ।
ਵੱਖੋ ਵਖਰੇ ਝੰਡੇ ਲਾਉਂਦੇ ।
ਸਭ ਨੂੰ ਕਰਮਕਾਂਡ ਸਖਾਉਂਦੇ ।
ਸਾਂਝੇ ਸੱਚ ਦੀ ਬਾਤ ਨਾ ਪਾਉਂਦੇ ।
ਇੱਕ ਦੂਜੇ ਲਈ ਨਫਰਤ ਭਰਕੇ ਕੰਧਾਂ ਜਾਣ ਵਧਾਈ ।।
ਆਜੋ ਰਲ਼ਕੇ ਬਹਿਣਾ ਸਿੱਖੀਏ ।
ਇੱਕ ਦੂਜੇ ਨੂੰ ਸਹਿਣਾ ਸਿੱਖੀਏ ।
ਹਸਦੇ-ਵਸਦੇ ਰਹਿਣਾ ਸਿੱਖੀਏ ।
ਸੱਚ ਸੁਨਣਾ ਸੱਚ ਕਹਿਣਾ ਸਿੱਖੀਏ ।
ਏਕਸ ਕੇ ਬਾਰਿਕ ਜੇ ਬਣਗੇ ਕੁਦਰਤ ਹੋਊ ਸਹਾਈ ।
ਗੁਰਮੀਤ ਸਿੰਘ ‘ਬਰਸਾਲ’ (ਕੈਲੇਫੋਰਨੀਆਂ)
Subscribe to:
Posts (Atom)