ਬ੍ਰਾਹਮਣਬਾਦ ਬਨਾਮ ਪੁਜਾਰੀਬਾਦ ।।

ਬ੍ਰਾਹਮਣਬਾਦ ਬਨਾਮ ਪੁਜਾਰੀਬਾਦ  ।।

ਬ੍ਰਾਹਮਣ ਦਾ ਸ਼ਬਦੀ ਅਰਥ ਬ੍ਰਹਿਮ ਦੀ ਵਿਚਾਰ ਕਰਨ ਵਾਲਾ ਹੁੰਦਾ ਹੈ ।

ਬ੍ਰਹਮੁ ਬਿੰਦੇ ਸੋ ਬ੍ਰਾਹਮਣੁ ਹੋਈ (ਪੰਨਾ 1127)

ਪਰ ਇਸਦਾ ਮਤਲਬ ਹਰਗਿਜ਼ ਇਹ ਨਹੀਂ ਹੁੰਦਾ ਕਿ ਉਸ ਬ੍ਰਾਹਮਣ ਦਾ ਪਰਿਵਾਰ ਜਾਂ ਕੁਲਾਂ ਵੀ ਬ੍ਰਹਮ ਦੀ ਵਿਚਾਰ ਕਰਨ ਵਾਲੀਆਂ ਹੀ ਹੋਣਗੀਆਂ । ਇਸ ਤਰਾਂ ਬ੍ਰਾਹਮਣ ਸਿਰਫ ਵਿਸ਼ੇਸ਼ਣ ਹੋ ਸਕਦਾ ਹੈ,ਆਉਣ ਵਾਲੀਆਂ ਬ੍ਰਾਹਮਣ ਦੀਆਂ ਪੀੜੀਆਂ ਦੀ ਸਦੀਵੀ ਪਕੜ ਵਾਲਾ ਕੋਈ ਨਾਮ ਨਹੀਂ । ਕਿਰਤ ਅਧਾਰਿਤ ਵੰਡ ਅਨੁਸਾਰ ਕਿਰਤ ਬਦਲਣ ਨਾਲ ਵਰਗ ਦਾ ਬਦਲਣਾ ਵੀ ਜਰੂਰੀ ਸੀ । ਪਰ ਬ੍ਰਾਹਮਣ ਨੇ ਆਪਣੀ ਚਲਾਕੀ ਨਾਲ ਬ੍ਰਾਹਮਣ ਦੀ ਡਿਗਰੀ ਸਦਾ ਲਈ ਆਪਣੇ ਨਾਮ ਨਾਲ ਚਿਪਕਾ ਲਈ । ਸ਼ਾਇਦ ਇਸੇ ਲਈ ਉਸਦੀ ਇਸ ਯੋਜਨਾਂ ਦਾ ਭਾਂਡਾ ਭੰਨਦਾ ਹੋਇਆ ਸ਼ਬਦ ਬ੍ਰਾਹਮਣਬਾਦ ਹੋਂਦ ਵਿੱਚ ਆ ਗਿਆ । ਅਸਲ ਵਿੱਚ ਇਹ ਬ੍ਰਾਹਮਣਬਾਦ ਸ਼ਬਦ ਕਿਸੇ ਜਾਤੀ ਸੂਚਕ ਬ੍ਰਾਹਮਣ ਦੀ ਮੁਖਾਲਫ਼ਤ ਨਹੀਂ ਕਰਦਾ ਸਗੋਂ ਬ੍ਰਾਹਮਣ ਦੀ ਉਸ ਚਲਾਕੀ ਅਤੇ ਮਕਾਰੀ ਦਾ ਪਰਦਾ ਫਾਸ਼ ਕਰਦਾ ਹੈ, ਜਿਸ ਨਾਲ ਉਸਨੇ ਸਦਾ ਲਈ ਇਹ ਨਾਮ ਆਪਣੀਆਂ ਕੁਲਾਂ ਲਈ ਰਾਖਵਾਂ ਕਰਵਾਕੇ ਸਮਾਜ ਦੇ ਬਾਕੀ ਵਰਗਾਂ ਦੀ ਸਦੀਵੀ ਲੁੱਟ ਲਈ ਪੱਕੀ ਵਿਓਂਤ ਬੰਦੀ ਕੀਤੀ ਹੈ ।

ਨਿੰਦਾ

ਨਿੰਦਾ

ਚੋਰੀ ਕਰਦੇ ਮਨੁੱਖ ਨੂੰ ਤੱਕ ਕੇ ਤੇ,

ਲੋਕੀਂ ਚੁੱਪ ਕਰ ਜੋ ਲੰਘ ਆਂਵਦੇ ਨੇ।।

ਸੂਝਵਾਨ ਮਨੁੱਖਾਂ ਦੀ ਨਜਰ ਵਿੱਚ ਉਹ,

ਚੋਰ ਨਾਲ ਹੀ ਰਲੇ ਸਮਝੇ ਜਾਂਵਦੇ ਨੇ।।

ਨਿੰਦਿਆ ਹੁੰਦੀ ਨਹੀਂ ਚੋਰ ਨੂੰ ਚੋਰ ਕਹਿਣਾ,

ਭਾਵੇਂ ਚੋਰ ਤਾਂ ਉਲਟ ਸਮਝਾਂਵਦੇ ਨੇ।।

ਅਰਥ ਸਰਬੱਤ ਦੇ ਭਲੇ ਦੇ ਉਹ ਕਿਓਂਕਿ,

ਆਪਣੇ ਸਵਾਰਥ ਹਿਤ ਸਭ ਨੂੰ ਸਿਖਾਂਵਦੇ ਨੇ।।

ਚੋਰ ਲੱਗੇ ਜੋ ਪੰਥ ਨੂੰ ਧਾਰ ਨੀਤੀ,

ਚਾਲ ਉਹਨਾਂ ਦੀ ਜੋ ਪ੍ਰਗਟਾਂਵਦੇ ਨੇ।।

ਪਛਾਣ ਕਰਨ ਲਈ ਚੋਰ ਤੇ ਸਾਧ ਵਾਲੀ,

ਕਸਵੱਟੀ ਗੁਰੂ ਗ੍ਰੰਥ ਦੀ ਲਾਂਵਦੇ ਨੇ।।

ਸਿੱਖੀ ਸਿੱਖਿਆ ਗੁਰ ਵਿਚਾਰ ਵਰਗੀ,

ਜੀਵਨ ਵਿੱਚ ਰਹੁ-ਰੀਤ ਅਪਣਾਂਵਦੇ ਨੇ।।

ਇਹ ਲਾਈਨਾਂ ਸਮਰਪਤ ਉਹਨਾਂ ਨੂੰ ਜੋ,

ਆਪ ਜਾਗੇ ਤੇ ਅੱਗੇ ਜਗਾਂਵਦੇ ਨੇ।।।।

ਡਾ ਗੁਰਮੀਤ ਸਿੰਘ ਬਰਸਾਲ(ਕੈਲੇਫੋਰਨੀਆਂ)

ਪ੍ਰੋ ਸਰਬਜੀਤ ਸਿੰਘ ਧੂੰਦਾ

ਪ੍ਰੋ ਸਰਬਜੀਤ ਸਿੰਘ “ਧੂੰਦਾ”

ਪਈ “ਧੂੰਦੇ” ਨੂੰ ਸਿੱਖੀ ਦੀ ਧੂਹ ਐਸੀ ,

ਧੁਸੇ ਸਿੱਖੀ ਵਿੱਚ ਉਹਨੇ ਗ਼ਦਾਰ ਧੂਹਤੇ ।

ਕਰਨ ਗੰਧਲਾ ਜੋ ਫਲਸਫਾ “ਇੱਕ” ਵਾਲਾ ,

ਖੋਟੇ ਦਿਲਾਂ ਦੇ ਸਰੇ-ਬਾਜਾਰ ਧੂਹਤੇ ।

ਕਰਮ ਕਾਂਢਾਂ ਦੀ ਧੁੰਦ ਨੂੰ ਲਾਹੁਣ ਖਾਤਿਰ ,

ਜੱਥੇਦਾਰ ਕਾਹਦੇ ਡੇਰੇਦਾਰ ਧੂਹਤੇ ।

ਸੱਚ ਤਰਕ ਦਾ ਗੁਰੂ ਗ੍ਰੰਥ ਅੰਦਰ ,

ਬਾਬੇ ਨਾਨਕ ਤੋਂ ਲੈਕੇ ਹਥਿਆਰ ਧੂਹਤੇ ।

ਕੇਵਲ ਗੁਰੂ ਗਿਆਨ ਦੀ ਖੜਗ ਲੈਕੇ ,

ਸਾਰੇ ਅੰਧਵਿਸ਼ਵਾਸੀ ਬਿਮਾਰ ਧੂਹਤੇ ।

ਨੌਜਵਾਨਾਂ ਦੇ ਦਿਲਾਂ ਦੀ ਬਣ ਧੜਕਣ ,

ਤੱਤ ਗੁਰਮਤਿ ਦਾ ਕਰ ਇਕਰਾਰ ਧੂਹਤੇ ।

ਫਾਂਸੀ ਹੱਕ ਤੇ ਸੱਚ ਨੂੰ ਦੇਣ ਵਾਲੇ ,

ਬਿਪਰੀ ਲੋਕ ਨੇ ਸਦਾ ਹੀ ਛਲ ਕਰਦੇ ।।

ਵੈਰੀ ਸੱਚ ਦੇ ਮੁੱਢ ਕਦੀਮ ਤੋਂ ਜੋ ,

ਉਹੀਓ “ਧੂੰਦੇ” ਨੂੰ ਧੂਹਣ ਦੀ ਗੱਲ ਕਰਦੇ ।।

ਜਦੋਂ ਯੂਬਾ ਸਿਟੀ ਮੇਲੇ ਤੇ.................

ਜਦੋਂ ਯੂਬਾ ਸਿਟੀ ਮੇਲੇ (ਨਗਰ ਕੀਰਤਨ) ਤੇ ਇੰਟਰਨੈੱਟ ਗਰੁੱਪ ਜਮੀਨ ਤੇ ਉੱਤਰਿਆ!!...ਇੱਕ ਸਰਵੇਖਣ

(ਡਾ ਗੁਰਮੀਤ ਸਿੰਘ ਬਰਸਾਲ ਕੈਲੇਫੋਰਨੀਆਂ)

ਗੁਰੂ ਗ੍ਰੰਥ ਸਾਹਿਬ ਜੀ ਦੇ ਪ੍ਰਕਾਸ਼ ਉਤਸਵ ਦੇ ਸਬੰਧ ਵਿੱਚ ਹਰ ਸਾਲ ਯੂਬਾ ਸਿਟੀ (ਕੈਲੇਫੋਰਨੀਆਂ) ਵਿੱਚ ਵਿਸ਼ਾਲ ਨਗਰ ਕੀਰਤਨ ਹੁੰਦਾ ਹੈ । ਇਹ ਨਗਰ ਕੀਰਤਨ ਅਮਰੀਕਾ ਦਾ ਸਭ ਤੋਂ ਵੱਡਾ ਨਗਰ ਕੀਰਤਨ ਹੈ । ਇਸ ਨਗਰ ਕੀਰਤਨ ਵਿੱਚ ਟਰੱਕਾਂ ਤੇ ਸਜਾਏ ਫਲੋਟਾਂ ਦੀ ਗਿਣਤੀ ਕਰਨੀ ਮੁਸ਼ਕਲ ਹੋ ਜਾਂਦੀ ਹੈ । ਯੂਬਾ ਸਿਟੀ ਇੱਕ ਪੇਂਡੂ ਇਲਾਕਾ ਹੋਣ ਕਾਰਨ ਟਰੈਫਕ ਦੀ ਜਿਆਦਾ ਸਮੱਸਿਆ ਨਾਂ ਹੋਣ ਕਾਰਣ ਪ੍ਰਸ਼ਾਸ਼ਨ ਨਗਰ ਕੀਰਤਨ ਦੀ ਇਜਾਜਤ ਸਹਿਜੇ ਹੀ ਦੇ ਦਿੰਦਾ ਹੈ। 4-5 ਘੰਟੇ ਲਗਾਤਾਰ ਸੜਕਾਂ ਤੇ ਚਲ ਰਹੇ ਇਸ ਨਗਰ ਕੀਰਤਨ ਦੋਰਾਨ ਸੜਕਾਂ ਦੇ ਦੋਵੇਂ ਪਾਸੇ ਦਾ ਨਜਾਰਾ ਵਿਲੱਖਣ ਹੀ ਹੁੰਦਾ ਹੈ । ਹਰ ਵਾਰ ਸ਼ਾਮਲ ਹੋਣ ਵਾਲਿਆਂ ਦੇ ਅੰਦਾਜੇ ਮੁਤਾਬਕ ਇਸ ਨਗਰ ਕੀਰਤਨ ਵਿੱਚ ਤਕਰੀਬਨ ਇੱਕ ਲ਼ੱਖ ਦੇ ਕਰੀਬ ਸੰਗਤਾਂ ਸ਼ਿਰਕਤ ਕਰਦੀਆਂ ਹਨ । ਨਗਰ ਕੀਰਤਨ ਤੋਂ ਪਹਿਲਾਂ ਕੀਰਤਨ ਦਰਬਾਰ, ਢਾਡੀ ਦਰਵਾਰ, ਕਵੀ ਦਰਬਾਰ ਆਦਿ ਦਾ ਪਰਬੰਧ ਕੀਤਾ ਜਾਂਦਾ ਹੈ । ਆਖਰੀ ਦਿਨ ਕਥਾ ਵਿਚਾਰ ਅਤੇ ਲੈਕਚਰ ਆਦਿ ਵੀ ਹੁੰਦੇ ਹਨ । ਜਿੱਥੇ ਇੱਕ ਪਾਸੇ ਖਾਣ ਪੀਣ ਦੇ ਅਣਗਿਣਤ ਤਰਾਂ ਦੇ ਭਾਂਤ ਸੁਭਾਂਤ ਦੇ ਸਮਾਨ ਦੇ ਫਰੀ ਸਟਾਲ ਹੁੰਦੇ ਹਨ ਉੱਥੇ ਆਮ ਮੇਲਿਆਂ ਵਾਂਗ ਘਰੇਲੂ ਸਮਾਨ ਦੀ ਖਰੀਦੋ ਖਰੋਫਤ ਵੀ ਕੀਤੀ ਜਾਂਦੀ ਹੈ ।ਯੂਬਾ ਸਿਟੀ ਇਲਾਕੇ ਦੇ ਗੋਰੇ ਨਾਗਰਿਕ ਵੀ ਦੂਰ ਦੁਰਾਡਿਓਂ ਇਸ ਮੇਲੇ ਨੂੰ ਦੇਖਣ ਪੁਜਦੇ ਹਨ । ਅੱਜ ਕੱਲ ਹੋਰ ਨਗਰ ਕੀਰਤਨਾਂ ਵਾਂਗ ਇਹ ਵੀ ਇੱਕ ਮੇਲਾ ਹੀ ਬਣਦਾ ਜਾ ਰਿਹਾ ਹੈ ਜਿੱਥੇ ਕਿ ਗੁਰਮਤਿ ਪ੍ਰਚਾਰ ਨਾਲੋਂ ਦਿਖਾਵੇ ਜਾਂ ਘੁਮਣ ਫਿਰਨ ਅਤੇ ਖਾਣ-ਖਲਾਣ ਦੀ ਸ਼ਰਧਾ ਭਾਵਨਾਂ ਜਿਆਦਾ ਹੁੰਦੀ ਹੈ । ਪਰ ਅਜਿਹੇ ਮੌਕਿਆਂ ਤੇ ਜਿੱਥੇ ਹਰ ਤਰਾਂ ਦੀ ਆਪੋ ਆਪਣੀ ਸ਼ਰਧਾ ਪਰਧਾਨ ਹੁੰਦੀ ਹੈ ਉੱਥੇ ਕੁਝ ਸੱਚ ਨੂੰ ਪ੍ਰਣਾਏ ਵੀਰ ਹਰ ਸੰਗਤ ਜੁੜਨ ਦੇ ਮੌਕੇ ਨੂੰ ਗੁਰੂ ਨਾਨਕ ਸਾਹਿਬ ਦੇ ਨਿਰਾਲੇ ਫਲਸਫੇ ਨਾਲ ਜੋੜਨ ਦੀਆਂ ਕੋਸ਼ਿਸ਼ਾਂ ਕਰਦੇ ਨਜਰ ਆਉੰਦੇ ਰਹਿੰਦੇ ਹਨ। ਇਸੇ ਤਰਾਂ ਦੀਆਂ ਕੋਸ਼ਿਸ਼ਾਂ ਵਿੱਚ ਲੀਨ ਹੈ ਅਜੋਕਾ “ਅਖੌਤੀ ਸੰਤਾਂ ਦੇ ਕੌਤਕ” ਨਾਮ ਦਾ ਇੱਕ ਇੰਟਰਨੈੱਟ ਗਰੁੱਪ ਜੋ ਕਿ “ਇੱਕ ਗ੍ਰੰਥ ਤੇ ਇੱਕ ਪੰਥ” ਦੇ ਰਸਤੇ ਵਿੱਚ ਸਭ ਤੋਂ ਵੱਡੀ ਰੁਕਾਵਟ, ਹਰ ਤਰਾਂ ਦੇ ਡੇਰਾਵਾਦ ਨੂੰ ਮੰਨਦਾ ਹੋਇਆ ਕੇਵਲ ਇੱਕ ਨਾਲ ਇੱਕ ਹੋਣ ਲਈ ਸਮੁੱਚੀ ਲੁਕਾਈ ਨੂੰ , ਕੇਵਲ ਗੁਰੂ ਗ੍ਰੰਥ ਸਾਹਿਬ ਦੀਆਂ ਸਿੱਖਿਆਵਾਂ ਨਾਲ ਪ੍ਰਤੀਬੱਧ ਹੋਣ ਦਾ ਹੋਕਾ ਦੇ ਰਿਹਾ ਹੈ ।

ਥੱਪੜ

ਥੱਪੜ

ਬੰਨ੍ਹੇ ਸ਼ੇਰ ਉੱਤੇ ਹਮਲਾ ਕਰਨ ਵਾਲੇ,

ਕਾਂ,ਕੁੱਤੇ ਨਾਂ ਕਦੇ ਦਲੇਰ ਹੁੰਦੇ ।

ਪੂਛਾਂ ਚੁੱਕ ਕੇ ਦੂਰ ਤੋਂ ਭੌਂਕਦੇ ਜੋ,

ਨੇੜੇ ਆਉਣ ਤੇ ਮਿੱਟੀ ਦਾ ਢੇਰ ਹੁੰਦੇ ।

ਦਿਲ ਗਿੱਦੜਾਂ ਦੇ ,ਚਾਲ ਲੂੰਬੜਾਂ ਦੀ,

ਵਿੱਚੋਂ ਝੂਠ ਮਕਾਰੀ ਨਾਲ ਭਰੇ ਨੇ ਇਹ ;

ਥੱਪੜ ਮਾਰ “ਹਵਾਰੇ” ਨੇ ਦੱਸ ਦਿੱਤਾ,

ਸ਼ੇਰ ਬੇੜੀਆਂ ਵਿੱਚ ਵੀ ਸ਼ੇਰ ਹੁੰਦੇ ।।

ਡਾ ਗੁਰਮੀਤ ਸਿੰਘ “ਬਰਸਾਲ” ਕੈਲੇਫੋਰਨੀਆਂ

ਵੈਦਿਕ-ਅਰਥਾਵਲੀ

ਵੈਦਿਕ-ਅਰਥਾਵਲੀ
ਵੈਦਿਕ ਕਾਲ ਦੇ ਸ਼ਬਦਾਂ ਦੇ ਅਰਥ ਅੱਜ-ਕਲ,
ਗੁਰੂ-ਗਿਆਨ ਤੇ ਹਮਲੇ ਕਰਵਾਈ ਜਾਂਦੇ ।
ਕਰਮ-ਫਿਲਾਸਫੀ ਗੁਰਮਤਿ ਅਨਕੂਲ ਦਸਕੇ,
ਆਵਾ-ਗਵਣ ਨੂੰ ਸੀਸ ਝੁਕਵਾਈ ਜਾਂਦੇ ।
ਜਿਸ ਰਸਤਿਓਂ ਹਮਲੇ ਦਾ ਡਰ ਹੁੰਦਾ,
ਸਿਆਣੇ ਆਖਦੇ ਕਿਲਾ ਉਸਾਰ ਰੱਖੋ ;
ਕਈ ਅਜੇ ਵੀ ਵਿਪਰੋਂ ਅਵੇਸਲੇ ਹੋ,
ਭਵਿੱਖਤ ਹਮਲੇ ਲਈ ਰਾਹ ਛਡਵਾਈ ਜਾਂਦੇ ।।

ਡਾ ਗੁਰਮੀਤ ਸਿੰਘ 'ਬਰਸਾਲ ' (ਕੈਲੇਫੋਰਨੀਆਂ)

ਅੰਤਿਮ-ਛੋਹ

ਅੰਤਿਮ-ਛੋਹ
ਅੰਤਿਮ-ਛੋਹ ਤਸਵੀਰ ਨੂੰ ਦੇਣ ਵੇਲੇ,
ਗੁਰੂ ਸਿੱਖ ਨੂੰ ਜਦੋਂ ਸ਼ਿੰਗਾਰਦੇ ਨੇ ।
ਕਈ ਆਖਦੇ ਗੁਰਾਂ ਨੇ ਸੀਸ ਲਾਹੇ,
ਕਈ ਬਕਰੇ ਝਟਕੇ ਵਿਚਾਰਦੇ ਨੇ ।
ਰਮਜ਼ ਜਿਨਾਂ ਮਨੋਰਥ ਦੀ ਨਹੀਂ ਜਾਣੀ,
ਪਰਦਾ ਕਾਸਤੋਂ ਗੁਰਾਂ ਨੇ ਰੱਖਿਆ ਸੀ ?
ਗੁਰੂ ਸ਼ਬਦ ਸਿਧਾਂਤ ਨੂੰ ਛੱਡ ਪਾਸੇ,
ਤੰਬੂ ਚੁੱਕ-ਚੁੱਕ ਝਾਤੀਆਂ ਮਾਰਦੇ ਨੇ ।।
ਡਾ ਗੁਰਮੀਤ ਸਿੰਘ 'ਬਰਸਾਲ ' ਕੈਲੇਫੋਰਨੀਆਂ