ਓਹ ਤੇ ਤੂੰ !!

ਉਹ ਤੇ ਤੂੰ !

ਓਹ ਤੇ ਤੈਨੂੰ ਮਰਿਆ ਚਾਹੁੰਦਾ,
ਤੂੰ ਹੀ ਏਂ ਜੋ ਮਰਿਆ ਈ ਨਹੀਂ ।
ਉਹਦਾ ਸਰਦਾ ਤੇਰੇ ਬਾਝੋਂ,
ਤੇਰਾ ਕਾਹਤੋਂ ਸਰਿਆ ਈ ਨਹੀਂ ।।
ਤੇਰੇ ਜਨਮ ਤੋਂ ਤੇਰਾ ਦੁਸ਼ਮਣ,
ਭਾਵੇਂ ਚੁੱਕ ਇਤਿਹਾਸ ਦੇਖ ਲੈ,
ਬਾਬੇ ਨਾਨਕ ਤੋਂ ਅੱਜ ਤਾਈਂ,
ਉਸਦਾ ਅੰਦਰ ਠਰਿਆ ਈ ਨਹੀਂ ।।
ਕਰਮਕਾਂਢ ਜਿਹੀ ਪੂਜਾ ਛੱਡਕੇ,
ਬਾਬੇ ਸੱਚ ਦੇ ਲੜ ਲਾਇਆ ਸੀ ।
ਸੱਚ ਦੇ ਨਿਯਮੀਂ ਕਿਰਤ ਕਰਦਿਆਂ,
ਉਸਤੋਂ ਜਾਂਦਾ ਜਰਿਆ ਈ ਨਹੀਂ ।।
ਸੰਨ ਸੰਨਤਾਲੀ ਵੇਲੇ ਜਿਗਰੀ,
ਨਫਰਤ ਕੋਲੋਂ ਬੇਵਸ ਹੋਕੇ ।
ਤੇਰੀ ਮਾਂ ਦੇ ਦੋ ਟੁੱਕ ਕਰਕੇ,
ਸੱਚ ਕੋਲੋਂ ਓਹ ਡਰਿਆ ਈ ਨਹੀਂ ।
ਭੋਲ਼ਾ ਪੰਛੀ ਜਾਣ ਨਾ ਸਕਿਆ,
ਦੋਖੀ ਕਿੰਝ ਸ਼ਿਕਾਰ ਖੇਡਦਾ ।
ਸੰਨ ਚੋਰਾਸੀ ਵਾਲਾ ਸਾਕਾ,
ਤੇਰੇ ਖਾਨੇ ਬੜਿਆ ਈ ਨਹੀਂ ।।
ਤੈਨੂੰ ਹੀ ਦੋਸ਼ੀ ਠਹਿਰਾਕੇ,
ਤੈਨੂੰ ਹੀ ਹਥਿਆਰ ਬਣਾਵੇ ।
ਤੈਥੋਂ ਤੈਨੂੰ ਹੀ ਮਰਵਾਉਂਦਾ,
ਆਪੂ ਸਾਹਵੇਂ ਲੜਿਆ ਹੀ ਨਹੀਂ ।।
ਤੇਰੀ ਜਖ਼ਮੀ ਮਾਂ ਨੂੰ ਇਕ ਦਿਨ ,
ਤੈਥੋਂ ਹੀ ਬਿਕਵਾ ਕੇ ਛੱਡੂ।
ਜੱਗ ਜਾਣਦਾ ਬਿਪਰ ਚੱਟਿਆ,
ਮੁੜ ਕੇ ਹੋਇਆ ਹਰਿਆ ਈ ਨਹੀਂ ।।
ਡਾ ਗੁਰਮੀਤ ਸਿੰਘ ਬਰਸਾਲ (ਯੂ ਐਸ ਏ)
 

ਢਹਿ ਰਿਹਾ ਮਹਿਲ !!

ਢਹਿ ਰਿਹਾ ਮਹਿਲ !! ,,,,,,,,,,,,,,,,,,,,,,,,,,,,,,,,,,,,,,,, 

ਸਦੀਆਂ ਤੋਂ ਜਿਸ ਮਾਸ ਨੋਚਿਆ , ਦੁਨੀਆਂ ਸਾਰੀ ਦਾ ।

 ਢਹਿੰਦਿਆਂ ਢਹਿੰਦਿਆਂ ਢਹਿ ਚਲਿਆ ਹੈ , ਮਹਿਲ ਪੁਜਾਰੀ ਦਾ ।।

 ਰੱਬ ਦੇ ਨਾਂ ਤੇ ਹੋਰਾਂ ਨੂੰ ਜਜਬਾਤੀ ਕਰਦਾ ਏ ।

 ਆਪੂੰ ਧਰਮ ਦੀ ਪਹਿਲੀ ਪਉੜੀ ਤੋਂ ਵੀ ਹਰਦਾ ਏ ।

 ਫਇਦਾ ਚੁੱਕਦਾ ਰਾਜਨੀਤੀ ਨਾਲ ਲਾਈ ਯਾਰੀ ਦਾ ।

 ਢਹਿੰਦਿਆਂ ਢਹਿੰਦਿਆਂ ਢਹਿ ਚਲਿਆ ਹੈ , ਮਹਿਲ ਪੁਜਾਰੀ ਦਾ ।।

 ਚਾਲ ਨਾਲ ਇਕ ਰਸਤੇ ਵਾਲੇ ਵੱਖਰੇ ਕਰ ਲੈਂਦਾ ।

 ਕਰ ਇਕੱਲੇ ਫਿਰ ਇਹ ਛੇਕੂ ਸਾਣ ਤੇ ਧਰ ਲੈਂਦਾ ।

 ਏਹੀ ਸਿਖਿਆ ਬਿਪਰ ਗੁਰੂ ਤੋਂ ਕੰਮ ਮਕਾਰੀ ਦਾ ।

 ਢਹਿੰਦਿਆਂ ਢਹਿੰਦਿਆਂ ਢਹਿ ਚਲਿਆ ਹੈ , ਮਹਿਲ ਪੁਜਾਰੀ ਦਾ ।।

 ਸਦੀਆਂ ਤੋਂ ਤਾਂ ਏਦਾਂ ਹੀ ਇਹ ਕਰਦਾ ਆਇਆ ਹੈ ।

 ਜਿਦ ਨਹੀਂ ਛੱਡਦਾ ਪਰ ਸੱਚ ਹੱਥੋਂ ਹਰਦਾ ਆਇਆ ਹੈ ।

 ਇੱਕ ਦਿਨ ਤਾਂ ਲਭ ਜਾਣਾ ਹੁੰਦਾ ਹੱਲ ਬਿਮਾਰੀ ਦਾ ।

 ਢਹਿੰਦਿਆਂ ਢਹਿੰਦਿਆਂ ਢਹਿ ਚਲਿਆ ਹੈ , ਮਹਿਲ ਪੁਜਾਰੀ ਦਾ ।।

 'ਕੱਲੇ-'ਕੱਲੇ ਦੀਵੇ ਨੂੰ ਇਹ ਫੂਕਾਂ ਮਾਰ ਰਿਹੈ ।

 ਪਰ ਨਾ ਜਾਣੇ ਚਿਣਗਾਂ ਅੰਦਰ ਭਾਂਬੜ ਬਾਲ਼ ਰਿਹੈ ।

 ਆਖਿਰ ਫਟਣਾ ਗੁੱਸਾ ਸੰਗਤ ਸ਼ਰਧਾ ਮਾਰੀ ਦਾ ।

 ਢਹਿੰਦਿਆਂ ਢਹਿੰਦਿਆਂ ਢਹਿ ਚਲਿਆ ਹੈ , ਮਹਿਲ ਪੁਜਾਰੀ ਦਾ ।।

 ਗੁਰਮੀਤ ਸਿੰਘ ਬਰਸਾਲ (USA)

ਰੱਬ/ਕੁਦਰਤ

ਰੱਬ/ਕੁਦਰਤ

੧ ਨੂੰ ਪੂਰਾ ਦੇਖਣ ਵਾਲਾ,

ਬੰਦੇ ਦਾ ਤਾਂ ਕੱਦ ਨਹੀਂ ਹੈ ।

ਦਿਸਦਾ ਤੇ ਅਣਦਿਸਦਾ ਉਸ 'ਚੋਂ,

ਕਰ ਸਕਦਾ ਕੋਈ ਰੱਦ ਨਹੀਂ ਹੈ ।

ਖੋਜੇ ਤੇ ਅਣਖੋਜੇ ਸਾਰੇ,

ਨਿਯਮ ਓਸ ਦਾ ਹਿੱਸਾ ਹੀ ਨੇ ;

ਰੱਬ ਕਹੋ ਜਾਂ ਕੁਦਰਤ ਆਖੋ,

੧ ਦੀ ਕੋਈ ਹੱਦ ਨਹੀਂ ਹੈ ।।

ਗੁਰਮੀਤ ਸਿੰਘ ਬਰਸਾਲ (ਯੂ ਐਸ ਏ)

ਕਰਤਾ

ਕਰਤਾ !!

ਸੈਭੰ ਮਤਲਬ ਸਵੈ-ਪਰਕਾਸ਼ਤ,

ਰੱਬ ਅੱਧਾ ਜਾਂ ਸਾਰਾ ।

ਜੇ ਅੱਧਾ ਤਾਂ ਦੋ ਥਾਂ ਬਣਦੈ,

ਸਿਮਟਿਆ ਅਤੇ ਖਿਲਾਰਾ ।

ਅੱਧ ਸਿਮਟਿਆ ਤਾਂ ਦੂਜਾ ਅੱਧ ਵੀ,

ਉਸ ਦਾ ਕਰਮ-ਅਖਾੜਾ ।

ਤਦ ਖਿਲਰੇ ਦਾ ਦੋਸ਼ ਕੋਈ ਨਹੀਂ,

ਚੰਗਾ ਕਰੇ ਜਾਂ ਮਾੜਾ ।।

ਜੇ ਸਮਝੋਂ ਕਿ ਰੂਪ ਵਟਾਕੇ,

ਸਾਰਾ ਕਿਰਤ ਸਮੋਇਆ ।

ਜਿਮੇਵਾਰ ਫਿਰ ਹਰ ਕਰਮ ਦਾ,

ਕਰਤਾ ਕਦੇ ਨਾ ਹੋਇਆ ।।।।

ਗੁਰਮੀਤ ਸਿੰਘ  "ਬਰਸਾਲ"

ਛਲ !

ਛਲ !
ਜਦ ਗੱਲ ਚੱਲੇ ਪ੍ਰਣਾਲ਼ੀ ਦੀ,
ਤਦ ਬੰਦਿਆਂ ਦੀ ਜੋ ਗੱਲ ਕਰਦਾ ।
ਛੱਡ ਸਾਂਝ ਗੁਣਾਂ ਵਿਚਾਰਾਂ ਦੀ,
ਉਹ ਨਿੱਜ-ਨਾਮ ਦਾ ਹੱਲ ਕਰਦਾ ।
ਜੋ ਨਿੱਜੀ ਕਿੜਾਂ ਦੀ ਆੜ ਥੱਲੇ,
ਝੱਟ ਦੁਸ਼ਮਣ ਦੇ ਨਾਲ ਖੜਦਾ ਏ ।
ਜੋ ਸਹਿਜ ਸੁਨਾਮੀ ਬਣ ਸਕਦੀ,
ਉਹ ਲਹਿਰ ਓਸ ਨਾਲ ਛਲ ਕਰਦਾ ।।
ਗੁਰਮੀਤ ਸਿੰਘ ਬਰਸਾਲ (ਯੂ ਐਸ ਏ)

ਭੁਚਲਾਵਾ !

ਭੁਚਲਾਵਾ!
-----------------

ਹੋ ਸਕਦਾ ਹੈ 'ਮੈਂ' ਤੇ ੳੇੁਸ ਵਿੱਚ,
ਕਿਧਰੇ ਕੋਈ ਮਤਭੇਦ ਵੀ ਹੋਵੇ ।
ਸੌ `ਚੋਂ ਇੱਕ ਦੋ ਗੱਲਾਂ ਅੰਦਰ,
ਲਗਦੀ ਵੱਖਰੀ ਸੇਧ ਵੀ ਹੋਵੇ ।
ਹੋ ਸਕਦਾ ਹੈ ਗੱਲ ਸਮਝਣ ਵਿੱਚ,
ਸਾਡੀ ਸੋਚੇ ਛੇਦ ਵੀ ਹੋਵੇ ।
ਲੋੜ ਵੇਲੇ ਜੇ ਨਾਲ ਖੜੇ ਨਾ,
ਰਹਿੰਦੀ ਉਮਰੇ ਖੇਦ ਵੀ ਹੋਵੇ ।।
ਬਿਪਰ ਪੁਜਾਰੀ ਸਾਡੇ ਮਨ ਨੂੰ,
ਮੁੜਕੇ ਹੁਣ ਭੁਚਲਾ ਨਹੀਂ ਸਕਦਾ ।
ਛੇਕ-ਛਕਾਈ ਵਾਲੀ ਨੀਤੀ,
ਦੇ ਹੱਕ ਵਿੱਚ ਭੁਗਤਾ ਨਹੀਂ ਸਕਦਾ ।।
ਗੁਰਮੀਤ ਸਿੰਘ 'ਬਰਸਾਲ'(USA)

ਅੰਧਕਾਰ !!

ਅੰਧਕਾਰ !!

ਫਿਰ ਅੰਧਕਾਰ ਨੇ ਹਰ ਵਾਰ ਵਾਂਗੂ
ਸਿਰ ਉਠਾਇਆ ਹੈ ।।
ਚਾਨਣ ਕੱਜਣੇ ਲਈ ਮੂੜਤਾ ਦੀ
ਧੁੰਦ ਲਿਆਇਆ ਹੈ ।।
ਭਾਵੇਂ ਜਾਣਦਾ ਓਹ ਵੀ ।
ਕਿ ਨਾ ਇਹ ਓਸਦੇ ਵਸ ਦੀ ।
ਲੇਕਨ ਅੰਨਿਆ 'ਚੋਂ ਕਾਣੇ ਦਾ
ਰੁਤਬਾ ਜੋ ਪਾਇਆ ਹੈ ।।
ਦਿਖਾਕੇ ਖਾਬ ਮੰਗਲ ਦਾ ।
ਤੇ ਦਿੱਤਾ ਰਾਜ ਜੰਗਲ ਦਾ ।
ਕਾਵਾਂ ਕੁਤਿਆਂ ਗਿਰਝਾਂ
ਤੇ ਸੱਪਾਂ ਦਾ ਹੀ ਸਾਇਆ ਹੈ ।।
ਮਜਹਬ ਨੀਤਕਾਂ ਸੰਗ ਹੀ ।
ਹੈ ਬਣਦਾ ਇੱਕ ਹੀ ਰੰਗ ਹੀ ।
ਬਹੁ-ਰੰਗਿਆ ਲਿਬਾਸ ਉਸ
ਭਾਵੇਂ ਦਿਖਾਇਆ ਹੈ ।।
ਬੱਦਲ ਨ੍ਹੇਰ ਲਈ ਭਕਦੇ ।
ਸੂਰਜ ਡੱਕ ਨਹੀਂ ਸਕਦੇ ।
ਝੀਥਾਂ ਵਿੱਚ ਦੀ ਜਿਸਨੇ
ਮੇਰਾ ਆਂਗਨ ਖਿੜਾਇਆ ਹੈ ।।

ਗੁਰਮੀਤ ਸਿੰਘ ਬਰਸਾਲ