ਦੇਹ ਤੋਂ ਸ਼ਬਦ

ਦੇਹ ਤੋਂ ਸ਼ਬਦ !

ਦੇਹ ਤੋਂ ਸ਼ਬਦਾਂ ਵੱਲ ਜਦੋਂ ਕੋਈ ਹਿਲਦਾ ਹੈ ।

ਜੜ ਤੋਂ ਚੇਤਨ ਵੱਲ ਦਾ ਰਸਤਾ ਮਿਲਦਾ ਹੈ ।।

ਨਾ ਹੀ ਦੇਹ ਕੋਈ ਗੁਰੂ ਜਾਂ ਚੇਲਾ ਬਣਦੀ ਏ,

ਗਿਆਨ ਗੁਰੂ ਹੀ ਸੁਰਤ ਨੂੰ ਲੈ ਕੇ ਠ੍ਹਿਲਦਾ ਹੈ ।।

ਮਨ ਤਾਂ ਅਕਸਰ ਬਦਲ ਪੁਸ਼ਾਕਾਂ ਪਾਉਂਦਾ ਹੈ,

ਰੂਹ ਵਰਗਾ ਨਾ ਲੀੜਾ ਇਸਤੋਂ ਸਿਲਦਾ ਹੈ ।।

ਜਦ ਵੀ ਕੋਈ ਦੇਹ ਤੋਂ ਅੱਗੇ ਲੰਘਦਾ ਏ,

ਕਹੇ ਪੁਜਾਰੀ ਪੰਗਾ ਵਕਤੀ ਢਿੱਲ ਦਾ ਹੈ ।।

ਸੱਚ ਸੁਣਾਉਣੋਂ ਪਹਿਲਾਂ ਖੁਦ ਅਪਣਾਏ ਜੋ,

ਲੋਕੀਂ ਕਹਿਣ ਬੇਚਾਰਾ ਰੋਗੀ ਦਿਲ ਦਾ ਹੈ ।।

ਆੜ ਸ਼ਬਦ ਦੀ ਓਹਲੇ ਦੇਹ ਹੀ ਭੁਗਤੀ ਹੈ,

ਸੱਚ ਤਰਕ ਤਵੱਕਿਆਂ ਅੰਦਰ ਛਿਲਦਾ ਹੈ ।।

ਧਰਮ ਦੀ ਆੜੇ ਪੰਥ-ਮਜ਼ਹਬ ਦੀ ਗੱਲ ਹੁੰਦੀ,

ਕੋਟਨ ਮੇ ਹੀ ਕੋਊ ਨਾਨਕ ਖਿਲਦਾ ਹੈ ।।

ਵੋਟਰ

ਵੋਟਰ !!
ਜਦ ਤੱਕ ਵੋਟਰ ਪਾਰਟੀਆਂ ਨੂੰ ਵੋਟ ਪਾਉਂਦੇ ਰਹਿਣਗੇ ।
ਲੋਕ ਪੱਖੀ ਆਗੂਆਂ ਨੂੰ ਪਿੱਠ ਦਿਖਾਉੰਦੇ ਰਹਿਣਗੇ ।
ਇਹ ਜਾਣਦੇ ਹੋਏ ਕਿ, ਇਹਨਾ ਲੀਡਰਾਂ ਵਿੱਚ ਵਿੱਥ ਨਹੀਂ,
ਆਪਣੇ ਭਾਈਚਾਰਿਆਂ ‘ਚ ਵਿੱਥਾਂ ਵਧਾਉਂਦੇ ਰਹਿਣਗੇ ।।

ਜਦ ਵੀ ਵੋਟਰ ਆਪਦੀ ਜਮੀਰ ਨੂੰ ਜਗਾਉਣਗੇ ।
ਧੜਿਆਂ ਨੂੰ ਛੱਡਕੇ, ਕਿਰਦਾਰ ਨੂੰ ਜਤਾਉਣਗੇ ।
ਪਾਰਟੀਆਂ ਵਾਲੇ ਵੀ, ਏਸੇ ਗੱਲੋਂ ਮਜਬੂਰ ਹੋ ।
ਸੂਝ ਤੇ ਇਮਾਨ ਵਾਲੇ, ਆਗੂ ਅੱਗੇ ਲਾਉਣਗੇ ।।

ਜਾਗਦੀ ਜਮੀਰ ਵਾਲੇ, ਚੋਣ ਕਰ ਨਾ ਰੁਲਣਗੇ ।
ਜੇਕਰ ਅੰਦਰ ਸੱਚ ਹੋਊ, ਸੱਚ ਹੀ ਤਾਂ ਸੁਨਣਗੇ ।
ਸਮਾਜ ਦੇ ਬਦਲਾਵ ਲਈ ਤੇ ਨੀਤ ਸਾਫ ਚਾਹੀਦੀ,
ਵੋਟਰ ਸਾਫ ਹੋਣਗੇ ਤਾਂ ਸਾਫ ਆਗੂ ਚੁਨਣਗੇ ।।

ਜਦ ਤੱਕ ਇਹ ਵੋਟਰ ਇਖਲਾਕ ਨਹੀਂ ਜਗਾਊਗਾ ।
ਲਾਲਚ ਤੇ ਗਰਜਾਂ ਲਈ ਬਿਕਣੋਂ ਹਟ ਜਾਊਗਾ ।
ਲੋਕ-ਰਾਜ ਸੱਚਮੁੱਚ ਦਾ ਲੋਕ-ਰਾਜ ਬਣ ਸਕੇਗਾ,
ਜੇਕਰ ਸੂਝਵਾਨ ਵੋਟਰ ਗੁਣਾਂ ਨੂੰ ਅਪਣਾਊਗਾ ।।
ਗੁਰਮੀਤ ਸਿੰਘ ‘ਬਰਸਾਲ, (ਯੂ ਐਸ ਏ)

ਅਰਕ

ਅਰਕ
ਮੰਨਦੇ ਹਾਂ ਕਿ ਸਾਡੇ ਵਿੱਚ ਕੁੱਝ ਫਰਕ ਨੇ ।
ਹਰ ਫਰਕ ਦੇ ਆਪੋ-ਆਪਣੇ ਤਰਕ ਨੇ ।।
ਜਿੰਨੀ ਵੱਡੀ ਜੰਗ ਹੈ ਓਨੀਂ ਦਿਖਦੀ ਨਹੀਂ,
ਤਾਹੀਓਂ ਵੱਖੋ ਵੱਖਰੇ ਸਭਦੇ ਠਰਕ ਨੇ ।।
ਭਾਵੇਂ ਆਪੋ-ਆਪਣੇ ਥਾਂ ਸਭ ਯੋਧੇ ਨੇ,
ਚਾਣਕੀਆ ਲਈ ਇੱਕ ਨਿਤਾਣਾ ਜਰਕ ਨੇ ।।
ਨਿਵਣ,ਖਵਣ ਸੰਗ ਜੁਗਤੀ ਤੱਜਕੇ ਗੁਰਮਤਿ ਦੀ,
ਕੂਹਣੋ-ਕੂਹਣੀ, ਕਾਰਣ ਜਾਂਦੇ ਸਰਕ ਨੇ ।।
‘ਏਕੇ’ ਥੱਲੇ ਇੱਕ ਹੋਕੇ ਜੇ ਤੁਰ ਪਏ ਤਾਂ,
ਚਾਲਾਂ ਚੱਲਦੇ ਦੁਸ਼ਮਣ ਜਾਣੇ ਗਰਕ ਨੇ ।।
ਸ਼ਬਦ ਨਾਲ ਜੋ ਜੋੜਨ ਉਹ ਵੀ ਆਖਿਰ ਨੂੰ,
ਬਣਦੀ ਸਖਸ਼-ਪ੍ਸਤੀ ਏਹੋ ਅਰਕ ਨੇ ।।

ਚਿੱਤਰ/ਚਲ-ਚਿੱਤਰ

ਚਿੱਤਰ/ਚਲ-ਚਿੱਤਰ
ਗੁਰ ਮੂਰਤ ਤਾਂ ਸ਼ਬਦ ਗੁਰੂ ਦਾ,
ਸ਼ਬਦੋਂ ਬਾਝ ਗਿਆਨ ਨਹੀਂ ਹੈ ।
ਨਿਰਾਕਾਰ ਦੇ ਨਿਯਮ-ਰੂਪ ਨੂੰ,
ਮੰਨ ਲੈਣਾ ਅਪਮਾਨ ਨਹੀਂ ਹੈ ।
ਗੁਰ-ਸ਼ਬਦਾਂ ਦੇ ਰਚਨਕਾਰਾਂ ਦੀ,
ਨਕਸ਼ੀਂ ਕੋਈ ਪਹਿਚਾਣ ਨਹੀਂ ਹੈ ।
ਤਸਵੀਰਾਂ ਨਾਲ ਕਰਮ-ਕਾਂਡ ਕਰ,
ਸਿੱਖ ਦੀ ਬਣਦੀ ਸ਼ਾਨ ਨਹੀ ਹੈ ।
ਅੰਨ੍ਹੀ ਸ਼ਰਧਾ-ਵਸ,ਨਤਮਸਤਕ,
ਵਿਵਹਾਰਕ ਪੈਗਾਮ ਨਹੀਂ ਹੈ ।
ਦੇਹ ਵਾਂਗਰ ਹੀ ਸ਼ਬਦ ਪੂਜਦਾ,
ਅੱਜ ਪੁਜਾਰੀ ਆਮ ਨਹੀਂ ਹੈ ।
ਸਦੀਆਂ ਤੋਂ ਜੋ ਜਿਹਨ `ਚ ਉੱਕਰੀ,
ਢਾਹੁਣੀ ਰੀਲ਼ ਆਸਾਨ ਨਹੀਂ ਹੈ ।
ਚਿੱਤਰ ਜਾਂ ਚਲ-ਚਿੱਤਰ ਕੋਈ,
ਗੁਰਮਤਿ ਵਿੱਚ ਪ੍ਰਵਾਨ ਨਹੀਂ ਹੈ ।
ਗੁਰਮੀਤ ਸਿੰਘ ਬਰਸਾਲ (USA)