ਮਿਰਜਾ

ਮਿਰਜਾ !!

ਜਦ ਵੀ ਲੋਕੀਂ ਮਿਰਜੇ ਨੂੰ ਵਡਿਆਉਂਦੇ ਨੇ ।

ਭੈਣ ਭਰਾ ਦੇ ਰਿਸ਼ਤੇ ਨੂੰ ਦਫਨਾਉਂਦੇ ਨੇ ।

ਜਿਸਦਾ ਸੱਭਿਆਚਾਰ ਮੁਬਾਰਕ ੳਸਨੂੰ ਤਾਂ,

ਜਿਸਦਾ ਨਹੀਂ ਏ ਉਸਨੂੰ ਕਿਓਂ ਉਕਸਾਉਂਦੇ ਨੇ ।

ਮਾਮੇ ਦੀ ਧੀ ਮਿਰਜਾ ਕੱਢਕੇ ਲੈ ਗਿਆ ਸੀ,

ਕਾਹਤੋਂ ਲੋਕੀਂ ਫ਼ਖਰ ਨਾਲ ਇਹ ਗਾਉਂਦੇ ਨੇ ।

ਜਿਹਨਾਂ ਲਈ ਇਹ ਰਿਸ਼ਤਾ ਭੈਣ-ਭਰਾ ਦਾ ਹੈ,

ਉਹਨਾਂ ਲਈ ਕਿਉਂ ਰਿਸ਼ਤੇ ਨੂੰ ਛੁਟਿਆਉਂਦੇ ਨੇ ।

ਮਾਮੇਂ ਦੇ ਜਾਇਆਂ ਹੀ ਮਿਰਜਾ ਵੱਡਿਆ ਸੀ,

ਕਿਉਂ ਉਹ ਭਾਈ ਸਾਹਿਬਾਂ ਦੇ ਅਖਵਾਉਂਦੇ ਨੇ ।

ਪਾਕਿ ਮੁਹੱਬਤ ਰੂਹਾਂ ਦੀ ਗਲਵੱਕੜੀ ਏ,

ਗਾਇਕ-ਲੇਖਕ ਜਿਸਮਾਂ ਦੀ ਸਮਝਾਉਂਦੇ ਨੇ ।

ਖੁਦ ਦੇ ਬੱਚੇ ਮਿਰਜੇ-ਸਾਹਿਬਾਂ ਬਣਦੇ ਜਦ,

ਫੇਰ ਅਨੈਤਿਕ ਸੇਧਾਂ ਤੇ ਪਛਤਾਉਂਦੇ ਨੇ ।।

ਡਾ ਗੁਰਮੀਤ ਸਿੰਘ ਬਰਸਾਲ (ਕੈਲੇਫੋਰਨੀਆਂ)

ਸਿੱਖ-ਸੋਚ

ਸਿੱਖ ਸੋਚ !!

ਭਲਾ ਸਰਬੱਤ ਵਾਲਾ ਸੋਚਦੀ ਸੀ ਸੋਚ ਜਿਹੜੀ,

ਸੋਚੇ ਅੱਜ ਆਪ ਕਿੰਝ ਬਚਣਾ ਖੁਆਰੀ ਤੋਂ ।

ਵਰਗਾਂ ਦੀ ਘੜੀ ਮਰਿਆਦਾ ਕੋਲੋਂ ਬਾਗੀ ਹੋਕੇ,

ਲੁੱਟ-ਕੁੱਟ ਵਾਲੀ ਲੀਕ ਲੀਡਰਾਂ ਦੀ ਮਾਰੀ ਤੋਂ ।।

ਪੰਥ-ਪੰਥ ਆਖਕੇ ਵੀ ਪੰਥ ਦੇ ਵਿਰੁੱਧ ਰਹਿੰਦੀ,

ਰਹਿੰਦੀ ਬੇ-ਧਿਆਨੀ ਰਾਜਨੀਤੀ ਦੀ ਮਕਾਰੀ ਤੋਂ ।

ਏਕਤਾ ਦੇ ਨਾਮ ਉੱਤੇ ਰੈਲੀਆਂ ‘ਚ ਪੁੱਜ ਜਾਂਦੀ,

ਭਾਵੇਂ ਪਛਤਾਉਂਦੀ ਪਿੱਛੋਂ ਉੱਥੇ ਹੋਈ ਖੁਆਰੀ ਤੋਂ ।।

ਵਾਰ-ਵਾਰ ਥੋਖਾ ਖਾਕੇ ਹਰ ਵਾਰ ਭੁੱਲ ਜਾਂਦੀ,

ਝੱਟ ਪਿੱਛੇ ਲੱਗ ਜਾਂਦੀ ਥੋੜਾ ਪੁਚਕਾਰੀ ਤੋਂ ।

ਸਿੱਖ ਸੋਚ ਕਦੇ ਕੁਰਬਾਨੀ ਤੋਂ ਨਾ ਪਿੱਛੇ ਰਹਿੰਦੀ,

ਲੀਡਰ ਨਾ ਰਹਿੰਦੇ ਪਿੱਛੇ ਕਦੇ ਵੀ ਗਦਾਰੀ ਤੋਂ ।।

ਭਾਵੇਂ ਨਹੀਂ ਜਾਗੀ ਪਰ ਅੰਗੜਾਈ ਲੈ ਰਹੀ ਏ,

ਮਜਹਬੀ ਜਨੂਨ ਵਾਲੀ ਨੀਤੀ ਦੀ ਖੁਮਾਰੀ ਤੋਂ ।

ਬੰਦਿਆਂ ਨੂੰ ਛੱਡਕੇ ਵਿਚਾਰ ਜਦੋਂ ਆਗੂ ਬਣੇ,

ਬੇਗਮਪੁਰੇ ਦੀ ਕਿਹੜਾ ਰੋਕ ਲਊ ਉਸਾਰੀ ਤੋਂ ।।।।

ਡਾ ਗੁਰਮੀਤ ਸਿੰਘ ‘ਬਰਸਾਲ’ (ਕੈਲੇਫੋਰਨੀਆਂ)