“ਸੰਤਾਂ ਦੇ ਕੌਤਕ” ਫੇਸਬੁੱਕ ਗਰੁੱਪ ਦੇ ਨਾਂ
ਕੌਤਕ ਸੰਤਾਂ ਦੇ , ਦੇਖਣ ਲੋਕੀਂ ਸਾਰੇ ।।
ਖਿੱਲੀ ਉੱਡਦੀ ਏ , ਇੰਟਰ ਨੈੱਟ ਸਹਾਰੇ ।।
ਰੋਜੀ-ਰੋਟੀ , ਦੇ ਉਲਝਾਏ ।
ਠੱਗਾਂ ਲੱਖਾਂ , ਭੇਖ ਬਣਾਏ ।
ਗਿੱਟਿਆਂ ਤਿੱਕਰ , ਚੋਲੇ ਪਾਕੇ ;
ਸਿੱਧੇ-ਸਾਦੇ , ਲੋਕ ਫਸਾਏ ।
ਆਖਿਰ ਇੱਕ ਦਿਨ ,ਅੱਕ ਕੇ ਹਰ ਕੋਈ ,
ਵਧਕੇ ਛਿੱਤਰ ਮਾਰੇ ।
ਕੌਤਕ ਸੰਤਾਂ ਦੇ , ਦੇਖਣ ਲੋਕੀਂ ਸਾਰੇ ।।
ਸਾਂਝੇ ਰੱਬ ਤੋਂ , ਮੋੜ-ਮੋੜ ਕੇ ।
ਡੇਰਿਆਂ ਦੇ ਨਾਲ , ਜੋੜ-ਜੋੜ ਕੇ ।
ਸਾਧ ਵਿਚੋਲੇ , ਬਣ ਕੇ ਬਹਿ ਗਏ ;
ਗੁਰਬਾਣੀ ਤੋਂ , ਤੋੜ-ਤੋੜ ਕੇ ।
ਸਾਡਾ ਬਾਬਾ , ਰੱਬ ਦਾ ਪੀ-ਏ ,
ਚੇਲੇ ਕਹਿਣ ਵਿਚਾਰੇ ।
ਕੌਤਕ ਸੰਤਾਂ ਦੇ , ਦੇਖਣ ਲੋਕੀਂ ਸਾਰੇ ।।
ਧਨ-ਜੋਬਨ ਦੇ , ਇਹ ਸ਼ਿਕਾਰੀ ।
ਸ਼ੋਹਰਤ ਇਹਨਾ ਦੀ , ਮੱਤ ਮਾਰੀ ।
ਮਾਇਆ ਨਾਗਣ , ਦੱਸਕੇ ਸੱਭ ਨੂੰ ;
ਆਪਣੇ ਭਰਦੇ , ਮਹਿਲ-ਅਟਾਰੀ ।।
ਐਸ਼ੋ-ਇਸ਼ਰਤ , ਵਾਲਾ ਜੀਵਨ ,
ਬੈਠੇ ਲੈਣ ਨਜਾਰੇ ।
ਕੌਤਕ ਸੰਤਾਂ ਦੇ , ਦੇਖਣ ਲੋਕੀਂ ਸਾਰੇ ।।
ਫੇਸ-ਬੁੱਕ ਦਾ , ਸਮਾਂ ਸੀ ਆਇਆ ।
ਮੁੰਡਿਆਂ ਇੱਕ , ਗਰੁੱਪ ਬਣਾਇਆ ।
“ਸੰਤਾਂ ਦੇ ਕੌਤਕ” , ਨਾਂ ਰੱਖਕੇ ;
ਪੋਲ ਖੋਲਣੀ , ਮਨ ਵਿੱਚ ਧਾਇਆ ।।
ਜੋ-ਜੋ ਸਾਂਧਾਂ , ਲੁਕ-ਲੁਕ ਕੀਤੇ ,
ਨੰਗੇ ਕਰਤੇ ਕਾਰੇ ।
ਕੌਤਕ ਸੰਤਾਂ ਦੇ , ਦੇਖਣ ਲੋਕੀਂ ਸਾਰੇ ।।
ਕੋਈ ਸਾਧ , ਟੱਟੂ ਤੇ ਚੜਿਆ ।
ਕੋਈ ਸਾਧ , ਹੈ ਪੁੱਠਾ ਖੜਿਆ ।
ਮਿਹਨਤ-ਕਸ਼ , ਖੁਦਕੁਸ਼ੀਆਂ ਕਰਦੇ ;
ਉਹਨਾਂ ਖਾਤਿਰ , ਕੋਈ ਨਾ ਲੜਿਆ ।।
ਮਨਮਤਿ ਖਾਤਿਰ , ਭੋਰੇ ਪੱਟੇ ,
ਸੱਚ ਖੰਡ ਪਰਚਾਰੇ ।
ਕੌਤਕ ਸੰਤਾਂ ਦੇ , ਦੇਖਣ ਲੋਕੀਂ ਸਾਰੇ ।।
ਸਾਧਾਂ ਦਾ ਡਰ , ਰਿਹਾ ਨਾ ਕਾਈ ।
ਲੋਕਾਂ ਸਭ ਦੀ , ਰੇਲ ਬਣਾਈ ।
ਸਾਧ-ਸੰਤ ਦੀ , ਕੀ ਪਰਿਭਾਸ਼ਾ ?
ਗੁਰਮਤਿ ਦੀ , ਕਸਵੱਟੀ ਲਾਈ ।।
ਕਿਰਤੀ ਲੋਕੀਂ ,ਜਾਗਣ ਲੱਗ ਪਏ ,
ਠੱਗ ਗਏ ਦੁਰਕਾਰੇ ।
ਕੌਤਕ ਸੰਤਾਂ ਦੇ , ਦੇਖਣ ਲੋਕੀਂ ਸਾਰੇ ।।
ਖਿੱਲੀ ਉਡਦੀ ਏ , ਇੰਟਰ ਨੈਟ ਸਹਾਰੇ ।।
